Ársskýrslur‎ > ‎

2006

Starfsskýrsla u.m.f. Æskunnar 2006

 Aðalfundur félagsins var haldinn í Valsárskóla 26. apríl 2006. Nýr stjórnarmaður var kjörinn, Hrafnhildur Guðjónsdóttir en aðrir í stjórn eru: Starri Heiðmarsson, formaður, Svala Einarsdóttir, gjaldkeri, Halldór Arinbjarnarson og Birkir Örn Stefánsson. Á fundinum var lýst kjöri íþróttamanns Æskunnar en þann titil hlaut að þessu sinni Ólöf Línberg Kristjánsdóttir. Í 2.-3. sæti urðu þær Sigríður Ingibjörg Stefánsdóttir og Linda Ársælsdóttir.

 Starfsemi félagsins á árinu var með hefðbundnu sniði. Síðastliðið vor var boðið upp á sundnámskeið fyrir yngstu börnin undir leiðsögn Hrafnhildar Guðjónsdóttur, íþróttakennara. Frjálsíþróttaæfingar á vegum félagsins voru haldnar tvisvar í viku og voru þær vel sóttar einkum af yngri krökkunum. Frjálsíþróttaþjálfari var Edda Línberg Kristjánsdóttir, íþróttakennaranemi og naut hún aðstoðar Svanhildar Önnu Árnadóttur, Sigríðar Ingibjargar Stefánsdóttur og Lindu Ársælsdóttur. Birkir Örn Stefánsson var svo framan af sumri með eina kvöldæfingu sem fullorðnir voru hvattir til að mæta á. Féllu þær æfingar niður um mitt sumar vegna áhugaleysis. Frjálsíþróttafólk félagsins tók svo þátt í fjölda móta og stóð sig með prýði. Fótboltaæfingar voru haldnar fyrir 12 ára og yngri undir stjórn Árna Steinars  og Tryggva Stefánssona og voru þær vel sóttar.

 Annan september var Æskudagurinn haldinn og líkt og undanfarin tvö ár nutum við liðsinnis kvenfélagsins við skipulagningu dagsins. Buðu kvenfélagskonur upp á kaffi auk þess sem sölutjöld voru opin. Tókst dagurinn vel til og þökkum við ungmennafélagar kvenfélaginu fyrir samstarfið.

Síðastliðinn vetur buðum við grunnskólanemum sveitarfélagsins til íþróttamorgna á laugardögum þar sem blandað er saman leikjum og æfingum. Hafa laugardagsmorgnarnir mælst vel fyrir meðal yngri krakkanna og var því haldið áfram á sömu braut í haust. Einnig hefur félagið haft forgöngu um körfubolta fullorðinna einu sinni í viku.

                                                                       Fyrir hönd stjórnar

                                                                        Starri Heiðmarsson formaður

Comments